Bjarnat Krawc • Chórowy spěwnik/Chorliederbuch

Chórowy spěwnik nawjazuje na prěni zběrnik Krawcowych spěwow, kiž wuńdźe lěta 1994 w Ludowym nakładnistwje Domowina. Wobsahuje rjad dotal hišće njewozjewjenych originalnych kompozicijow kaž tež wobdźěłanjow serbskich ludowych spěwow w dwu- do pjećhłósnych sadźbach za dźěćace, žónske, muske a měšane chóry. Wosebitosć je zběrka 25 serbskich ludowych spěwow, “Słónčne pruhi I” (1927) a “Słónčne pruhi II” (1928), kiž bě Krawc tři- a štyrihłósnje za žónski chór wobdźěłał. Tutym sadźbam poda nimo serbskeho tež čěski a zwjetša němski tekst. Zajimcam serbskeje chóroweje hudźby předleži ze spěwnikom dalši wužitny material, kiž swědči wo Krawcowym mnohostronskim tworjenju jako komponist, wobdźěłar, dirigent a spěchowar chóroweho hibanja nic jenož w Serbach a wo jeho přećelskich stykach do Čěskeje.