Lizka wjaza kózlika
Lizka, kotrejež nank daloko preč we wulkim měsće dźěła, je wotydźenja z maćerku sama. Hdyž pak dyrbi ta popołdnju na dźěło abo hdyž Lizku šija boli, so jeje najlubši wuj Florian wo holčku stara. Zhromadnje sej hrajkataj, po měsće dundataj abo w parku kački picujetaj. Rjaneho dnja pak njesłuša kedźbnosć najlubšeho wuja Floriana hižo jeničce jej samej: Tomaš je sobu do jeho bydlenja zaćahnył a Lizka ma naraz dweju wujow. Wot 6 lět
„Titul ‚Lizka wjaza kózlika‛ njemóže charakter knihi lěpje wopisować. Wona je lóštna a Lizka je sympatiska mała holčka, to njeje jenož wuběrnje do słowow wjazane, ale tež rjenje ilustrowane. Tak rostu małej Lizce město wopuškow tež raz małe rohi kózlatka, hdyž so zaso jónu tak porjadnje na swój wobswět hněwa.“
Lydija Maćijowa
Wuj Florian samo wočakuje, zo wona z Tomašom do zwěrjenca dźe. To so jej njelubi, a wona wjaza kózlika. Bórze pak pytnje, zo ma Tomaš tež swoje dobre stronki.
Kniha wěnuje so temje, z kotrejž su tež dźěći dźeń a husćišo konfrontowane ─ swoje zwučene městno w mjezyčłowjeskich poćahach spušćić a nowe namakać. Čućiwje, ale přiwšěm šibale a lochce rysuje awtorka tele bytostne žiwjenske nazhonjenje z wida małeje Lizki.
| Sprache | Obersorbisch |
|---|---|
| ISBN | 978-3-7420-2402-2 |
| Seitenzahl | 28 |
| Einband | mnoho barbnych ilustracijow, kruta wjazba |
| Bibliographie | 1. nakł. 2016, 28 s., mnoho barbnych ilustracijow, kruta wjazba |
| Veröffentlicht: | 27.07.2016 |
Anmelden