Kak to jenož praju?
“Kak to jenož praju?” Štó drje so to hišće njeje prašał, pisajo list, rozprawu abo nastawk a pytajo za słowami z kotrymiž móhł swoje mysle najlěpje podać. Štóž so nochce wospjetować a stajnje te samsne słowa wužiwać pyta hustodosć w synonymowym słowniku za so lěpje hodźacym słowom.
Za nas Serbow rěkaše to zwjetša, sej z němskorěčnymi synonymowymi słownikami wupomhać, sej serbske słowo najprjedy do němčiny přełožić a potom za so hodźacym słowom pytać.
Rěčny centrum WITAJ wuda nětko zhromadnje z LND přiručku “Kak to jenož praju?” z pjera Lubiny Hajduk-Veljkovićoweje. Je to prěnja jednorěčna hornjoserbska přiručka, w kotrejž nadeńdźe wužiwar za něhdźe 2.100 hesła wotpowědniki, z kotrymiž móže pytane słowo narunać. Njeje to ryzy synonymowy słownik, skerje słownik synonymow a po wobsahu podobnych słowow, kotrež hesłowemu słowu wotpowěduja. Dokelž so hustodosć jich woznam porno hesłowemu słowu změni, maja přikładowe sady prawe nałožowanje znazornić. Rěčne wobroty a přisłowa přiručku přidatnje wobohaćeja.
“Kak to jenož praju?” njeje wědomostna přiručka a nima narok, być dospołna. Ma być wužiwarjej pomoc so hodźace słowo abo wobrot namakać a z tym swój słowoskład rozšěrić. Byrnjež hłownje na šulerjow wot 5. do 12. lětnika wusměrjena była, sej zawěsće tež dalši zajimcy to jedne abo druhe słowo wotkryja, kotrež jim snano w prěnim wokomiku njeby do mysli přišło.
| Sprache | Obersorbisch |
|---|---|
| ISBN | 978-3-7420-1481-8 |
| Seitenzahl | 144 |
| Einband | kruta wjazba |
| Autoren | Lubina Hajduk-Veljkovićowa |
| Bibliographie | 1. nakł. 2017, 144 s., kruta wjazba |
| Veröffentlicht: | 01.06.2017 |
Anmelden